पुटिनको निवासमाथि आक्रमण हुनुले युद्धलाई खतरनाक मोडतर्फ धकेल्न सक्ने चेतावनी
रुसले आफ्ना राष्ट्रपति भ्लादिमिर पुटिनको निजी निवासमाथि युक्रेनले ड्रोन आक्रमण गरेको दाबी गरेपछि अन्तर्राष्ट्रिय राजनीति तातेको छ। तर रक्षा तथा कूटनीतिक विषयका विज्ञहरूले यस्तो आक्रमण प्राविधिक रूपमा सम्भव भए पनि रणनीतिक रूपमा अर्थहीन र जोखिमपूर्ण हुने बताएका छन्।रुसी पक्षका अनुसार नोभगोरोड क्षेत्रस्थित लेक भाल्दाइ किनारमा रहेको पुटिनको राज्य आवासलाई लक्षित गर्दै युक्रेनले ९१ वटा लामो दूरीका ड्रोन प्रहार गरेको थियो। रुसी विदेशमन्त्री सेर्गेई लावरोभले यस घटनापछि शान्ति वार्ताबारे आफ्नो धारणा पुनरावलोकन गर्नुपर्ने बताएका छन्।युक्रेनी राष्ट्रपति भोलोदिमिर जेलेन्स्कीले भने उक्त आरोपलाई “रुसको अर्को झूटको श्रृंखला” भन्दै अस्वीकार गरेका छन्। उनले रुस शान्ति प्रक्रिया भाँड्न र ठूला आक्रमणको बहाना बनाउन यस्ता आरोप लगाइरहेको दाबी गरे।अन्तर्राष्ट्रिय सुरक्षाविज्ञहरूका अनुसार पुटिनका निजी र सरकारी निवासहरू रुसकै सबैभन्दा कडा सुरक्षा घेराभित्र पर्छन्। त्यहाँ अत्याधुनिक हवाई प्रतिरक्षा प्रणाली तैनाथ रहेकाले ड्रोन आक्रमण सफल हुने सम्भावना न्यून हुन्छ। साथै, यस्तो प्रयासले युक्रेनलाई कूटनीतिक रूपमा ठूलो क्षति पुर्याउने उनीहरूको विश्लेषण छ।यस घटनाप्रति भारतका प्रधानमन्त्री नरेन्द्र मोदीले गहिरो चिन्ता व्यक्त गर्दै हिंसा अन्त्य र कूटनीतिक प्रयासलाई प्राथमिकता दिन सबै पक्षलाई आग्रह गरेका छन्। भारतले सुरुदेखि नै रुस–युक्रेन युद्धमा शान्तिको पक्ष लिँदै आएको स्मरण गराइएको छ।अमेरिकाका राष्ट्रपति डोनाल्ड ट्रम्पले पनि पुटिनको निवासमाथि आक्रमण भएको दाबी “राम्रो संकेत नभएको” भन्दै असन्तुष्टि जनाएका छन्। उनले विश्व नेताको घरमाथि आक्रमण हुनुले युद्धलाई खतरनाक मोडतर्फ धकेल्न सक्ने चेतावनी दिएका छन्।विश्लेषकहरूका अनुसार यदि कुनै राष्ट्रप्रमुखमाथि प्रत्यक्ष आक्रमण भएको पुष्टि भएमा त्यसले आणविक युद्धसम्मको जोखिम बढाउन सक्छ। इतिहासमा पनि उच्च पदस्थ व्यक्तिको हत्या वा आक्रमणले ठूला युद्ध सुरु भएको उदाहरणहरू रहेका छन्।यसैबीच, पछिल्ला महिनाहरूमा रुसले युक्रेनमाथि ड्रोन र मिसाइल आक्रमण तीव्र बनाएको छ। युक्रेनका शहरहरूमा लगभग दैनिकजसो हवाई आक्रमण भइरहेका छन्, जसले सर्वसाधारणको जीवन झन् असुरक्षित बन्दै गएको छ।कूटनीतिक विश्लेषकहरूको निष्कर्षमा, पुटिनको घरमाथि आक्रमण भएको दाबीभन्दा पनि यसलाई प्रयोग गरेर युद्धलाई थप चर्काउने प्रयास भइरहेको संकेत बढी देखिन्छ। विश्व समुदायका लागि अहिलेको मुख्य चुनौती भनेको सम्भावित ठूलो द्वन्द्व रोक्दै शान्ति वार्तालाई जीवित राख्नु नै हो।