नवरात्रिको छैटौँ दिन आज कात्यायनी माताको पूजा गरिँदै

सुरेस कुमार थपलिया
काठमाडौं, असोज ३०। बडादसैँअन्तर्गत नवरात्रिको छैटौँ दिन आज नवदुर्गामध्ये छैटौँ स्वरूप माता कात्यायनीको पूजा–आराधना गरिँदै छ। आश्विन शुक्ल षष्ठीका दिन श्रद्धालु भक्तजनले विधिपूर्वक पूजा गरी सुख, शान्ति, समृद्धि र पारिवारिक कल्याणको कामना गर्ने धार्मिक परम्परा छ।
धार्मिक मान्यताअनुसार माता कात्यायनीलाई शक्ति, साहस र धर्मको प्रतीकका रूपमा लिइन्छ। उहाँको आराधना गर्नाले भक्तजनमा आत्मविश्वास, सकारात्मक सोच र अन्यायविरुद्ध लड्ने शक्ति प्राप्त हुने विश्वास गरिन्छ।
नवरात्रिका अवसरमा देशभरका दुर्गा मन्दिर तथा शक्तिपीठहरूमा बिहानैदेखि भक्तजनको चहलपहल बढ्ने गर्छ। घरघरमा दुर्गा भवानीको पूजा, दुर्गा सप्तशती पाठ तथा भजनकीर्तन गरी भक्तिभावका साथ नवरात्रि मनाइँदै छ।
नवरात्रि हिन्दू धर्मावलम्बीहरूको महत्त्वपूर्ण पर्व हो। नौ दिनसम्म नवदुर्गाका नौ स्वरूपको पूजा गरेपछि दसौँ दिन विजयादशमीका अवसरमा मान्यजनबाट टीका, जमरा र आशीर्वाद ग्रहण गर्ने परम्परा छ।