नवरात्रको पाँचौँ दिन आज स्कन्दमाताको पूजा, सुख–शान्ति र समृद्धिको कामना

सुरेस कुमार थपलिया

काठमाडौं, असोज २९। बडादसैँअन्तर्गत नवरात्रको पाँचौँ दिन आज असोज २९ गते बिहीबार देशभरका दुर्गा भवानीका मन्दिर तथा घरघरका पूजास्थलमा स्कन्दमाता देवीको पूजा–आराधना गरिँदैछ। नेपाली पात्रोअनुसार आज आश्विन शुक्ल पञ्चमी तिथि परेको छ।
नवरात्रका नौ दिनमा नवदुर्गाका नौ स्वरूपको पूजा गर्ने परम्पराअनुसार पाँचौँ दिन स्कन्दमाताको आराधना गरिन्छ। स्कन्दमाता भगवान् कार्तिकेय अर्थात् स्कन्दकी माता हुन्। धार्मिक मान्यताअनुसार उनलाई ममता, करुणा, ज्ञान र सन्तानको कल्याणकी प्रतीकका रूपमा पूजा गरिन्छ।
यस दिन भक्तजनले बिहानै स्नान गरी घर तथा पूजास्थल सफा गरेर देवीको पूजा गर्ने, फूल, अक्षता, फलफूल तथा प्रसाद चढाउने र दुर्गा सप्तशती पाठ एवं भजनकीर्तन गर्ने परम्परा छ। देवीको आराधना गर्दा परिवारमा सुख, शान्ति, समृद्धि र सकारात्मक ऊर्जा प्राप्त हुने धार्मिक विश्वास रहिआएको छ।
नवरात्रको प्रत्येक दिनको आफ्नै धार्मिक महत्त्व रहेकाले भक्तजनले श्रद्धा र भक्तिपूर्वक पूजा–आराधना गर्ने गर्छन्। घटस्थापनादेखि सुरु भएको नवरात्रमा दुर्गा भवानीका विभिन्न स्वरूपको पूजा गर्दै भक्तजन विजयादशमीको प्रतीक्षामा छन्।
नवरात्रको यस अवसरमा धार्मिक स्थलहरूमा पूजाआजा गर्ने, घरमा जमरा राखेर दुर्गा भवानीको उपासना गर्ने र परिवार तथा समाजको सुख–समृद्धिको कामना गर्ने चलन छ। नवरात्रले धार्मिक आस्था, पारिवारिक एकता र सांस्कृतिक परम्परालाई निरन्तरता दिन महत्त्वपूर्ण भूमिका खेल्दै आएको छ।