पाकिस्तानी नागरिकता भएका पाइलट तथा केबिन क्रुलाई त्यस्ता उडानमा खटाउन रोक

एनडीटीभीका अनुसार इजरायलसँग कूटनीतिक सम्बन्ध नभएका केही देशका नागरिकलाई उडानमा चालक दलका रूपमा काम गर्न रोक लगाउने व्यवस्थाको कार्यान्वयन पछिल्लो समय कडा पारिएको हो। यसले अन्तर्राष्ट्रिय विमान कम्पनीहरूलाई चालक दलको ड्युटी निर्धारण गर्दा नागरिकता र दोहोरो नागरिकतासमेत जाँच गर्नुपर्ने अवस्था सिर्जना गरेको छ।इजरायलले आफ्नो देशमा आउने र त्यहाँबाट बाहिरिने उडानमा चालक दलका सदस्यको राष्ट्रियतासम्बन्धी नियम कडा पारेपछि एयर फ्रान्सले पाकिस्तानी नागरिकता भएका पाइलट तथा केबिन क्रुलाई त्यस्ता उडानमा खटाउन रोक लगाएको छ। अमेरिकी विमान कम्पनी युनाइटेड एयरलाइन्स र चेक गणतन्त्रको स्मार्टविङ्सले पनि इजरायलको नियम पालना गर्ने प्रक्रिया अघि बढाएका छन्।

यो विषय सेप्टेम्बर ३०, २०२६ मा दुबईबाट तेल अभिभ जाँदै गरेको फ्लाईदुबईको विमानमा भएको भनिएको ककपिट घटनापछि थप चर्चामा आएको हो। समाचारअनुसार ओमानी सहपाइलटले विमानका भारतीय कप्तानमाथि आक्रमण गरी विमानको नियन्त्रण लिन खोजेको आरोप छ। यद्यपि, इजरायलको चालक दलसम्बन्धी प्रतिबन्ध उक्त घटनाभन्दा पहिलेदेखि नै रहेको बताइएको छ।

इन्डोनेसियाली पाइलट भेटिएपछि विमान फर्काइयो

इजरायलले नियम कार्यान्वयनमा कडाइ गरेको प्रभाव अक्टोबर १३ मा इथियोपियन एयरलाइन्सको एउटा उडानमा देखिएको समाचारमा उल्लेख छ। इजरायली अधिकारीहरूले विमानमा इन्डोनेसियाली पाइलट रहेको पहिचान गरेपछि विमानलाई फर्कन निर्देशन दिएका थिए।

द जेरुसेलम पोस्टलाई उद्धृत गर्दै एनडीटीभीले जनाएअनुसार विमान करिब एक घण्टाको उडानपछि इथियोपियाकै हवाई क्षेत्रमा रहेका बेला फर्काइएको थियो। विमान राजधानी अदिस अबाबा पुगेपछि सम्बन्धित पाइलटलाई परिवर्तन गरिएको थियो। त्यसपछि विमान पुनः उडेर तेल अभिभ पुगेको थियो।

इन्डोनेसिया मुस्लिमबहुल देश हो र इजरायलसँग यसको कूटनीतिक सम्बन्ध छैन। इथियोपियन एयरलाइन्सले भने पाइलटमाथि लागू हुने प्रतिबन्धबारे आफूलाई जानकारी नभएको भन्दै घटनालाई त्रुटि भएको बताएको समाचारमा उल्लेख छ।