हरितालिका तीज पर्व हर्षोल्लासका साथ मनाइँदै

सुरेस कुमार थपलिया

नेपाली हिन्दू महिलाहरूको प्रमुख धार्मिक तथा सांस्कृतिक पर्व हरितालिका तीज आज देशभर श्रद्धा, भक्ति र उल्लासका साथ मनाइँदैछ।तीजका अवसरमा महिलाहरू शिव–पार्वतीको पूजा–आराधना गरी परिवारको सुख, शान्ति, समृद्धि तथा श्रीमान्को दीर्घायुको कामना गर्ने परम्परा छ। विशेषगरी विवाहित तथा अविवाहित महिलाहरूले रातो सारी, चुरा, पोतेलगायतका पहिरनमा सजिएर तीजका गीत गाउँदै र नाच्दै पर्व मनाउने गरेका छन्।

तीजको अघिल्लो दिन दर खाने चलन रहेको छ भने तीजका दिन पूजा, व्रत तथा विभिन्न धार्मिक गतिविधि गर्ने परम्परा छ। पछिल्लो समय तीज पर्व धार्मिक आस्थासँगै नेपाली कला, संस्कृति र मौलिक परम्पराको संरक्षण तथा सामाजिक भेटघाटको अवसरका रूपमा समेत मनाउन थालिएको छ।

देशका विभिन्न शिवालय तथा धार्मिकस्थलमा बिहानैदेखि भक्तजनको भीड लागेको छ। पशुपतिनाथलगायत प्रमुख शिव मन्दिरहरूमा विशेष पूजा तथा दर्शनका लागि श्रद्धालुहरू पुगेका छन्।
हरितालिका तीजले नेपाली समाजमा आपसी सद्भाव, भाइचारा र सांस्कृतिक एकताको भावना अझ बलियो बनाउने विश्वास गरिन्छ।