चीनले पहिरो प्रभावित क्षेत्रमा खोजी तथा उद्धार अभियानलाई थप प्रभावकारी बनाउने
भीषण बाढी र त्यसपछि आएको पहिरोले तिब्बत क्षेत्रमा ठूलो क्षति पुर्याउनुका साथै केरूङ जोड्ने महत्वपूर्ण जि२१६ राष्ट्रिय राजमार्ग समेत क्षतिग्रस्त बनाएको थियो। चीनले तिब्बत क्षेत्रमा आएको विनाशकारी बाढी र पहिरोका कारण क्षतिग्रस्त केरूङ जोड्ने मुख्य राजमार्ग एक सातामै मर्मत गरी सञ्चालनमा ल्याएको छ।
चिनियाँ सञ्चारमाध्यम सिजिटिएनका अनुसार बुधबार बिहानदेखि उक्त राजमार्ग पुनः सञ्चालनमा आएको हो।राजमार्ग सञ्चालनमा आएपछि ठूला सवारीसाधन तथा भारी उद्धार उपकरण विपद् प्रभावित मुख्य क्षेत्रमा पुर्याउन थालिएको छ। यसले उद्धारकर्मीलाई प्रभावित क्षेत्रको थप भित्री भागसम्म पुगेर खोजी तथा उद्धार अभियान सञ्चालन गर्न सहज भएको बताइएको छ।उद्धार अभियानमा महत्वपूर्ण प्रगतिचाइना मिडिया ग्रुप (सिएमजी) का अनुसार जि२१६ राष्ट्रिय राजमार्ग पुनः सञ्चालनमा आउनुलाई गत बुधबारको विनाशकारी पहिरोपछि उद्धार अभियानमा भएको महत्वपूर्ण प्रगतिको रूपमा लिइएको छ।बरफ र चट्टानसहितको विशाल पहिरोमा परी चीनतर्फ १६ जनाको मृत्यु भएको छ भने ५४६ जना अझै सम्पर्कविहीन रहेको जनाइएको छ।कठिन भूगोल, प्रतिकूल मौसम र पहिरोले पुर्याएको ठूलो क्षतिका बाबजुद चिनियाँ उद्धार टोलीले खोजी अभियानलाई तीव्र बनाएको छ।हेलिकप्टरमार्फत विपद्को मुख्य क्षेत्रमा पुर्याइएका तिब्बत सीमा प्रहरीसहितका उद्धारकर्मीले सम्पर्कविहीन भएका कसैलाई पनि नछाड्ने बताएका छन्।जिगात्से सीमा नियन्त्रण टुकडीका प्रहरी अधिकारी ये यीले खोजी अभियानलाई अझ तीव्र बनाउने र सम्पर्कविहीन व्यक्तिहरूलाई खोज्न सम्भव भएसम्म सबै प्रयास गरिने बताएका छन्।घुँडासम्म माटो, खोजीमा ठूलो चुनौतीपहिरो प्रभावित क्षेत्रमा कतिपय स्थानमा माटो घुँडासम्म र केही ठाउँमा कम्मरसम्म जमेको उद्धारकर्मीले बताएका छन्।बाक्लो माटोका कारण उद्धार टोलीको आवतजावत सुस्त भएको छ। साथै, सामान्य रूपमा प्रयोग गरिने केही खोजी उपकरणको प्रभावकारिता समेत घटेको बताइएको छ।
विशेषज्ञहरूका अनुसार भूभागको अत्यधिक भिरालोपन, पहिरो बग्ने उच्च गति र साँघुरो उपत्यका पहिरोले यति ठूलो क्षति पुर्याउनुका प्रमुख कारण हुन्।कुकुरदेखि अत्याधुनिक उपकरणसम्म प्रयोगकठिन अवस्थाका बाबजुद उद्धार टोलीले विभिन्न माध्यमबाट सम्पर्कविहीनहरूको खोजी गरिरहेको छ।उद्धारकर्मीले जमिनमै म्यानुअल खोजी गर्दै माटो तथा भग्नावशेषमा ठोकेर, आवाज दिएर र सुनेर जीवनको कुनै संकेत छ कि छैन भन्ने पत्ता लगाउने प्रयास गरिरहेका छन्।त्यसका साथै दुईवटा तालिमप्राप्त खोजी कुकुरलाई छुट्टाछुट्टै क्षेत्रमा परिचालन गरिएको छ।भग्नावशेषभित्र पुरिएका मानिसको अवस्थिति पत्ता लगाउन जीवन पत्ता लगाउने अत्याधुनिक उपकरण समेत प्रयोग भइरहेको छ।उद्धारकर्मीका अनुसार पछिल्ला दिनमा नाकाको सम्पूर्ण क्षेत्रमा सतहको खोजी पूरा गरिनुका साथै माथिल्लो तहमा पटक–पटक खोजी तथा छानबिन गरिएको छ।सञ्चार सेवा पनि पूर्ण रूपमा पुनःस्थापितयसैबीच पहिरो प्रभावित क्षेत्रमा सञ्चार सेवा समेत पूर्ण रूपमा पुनःस्थापित गरिएको सिजिटिएनले जनाएको छ।
तिब्बतका दूरसञ्चार सेवा प्रदायकले मंगलबार साँझ ५ बजेसम्म एउटा बेस स्टेसन पुनः सञ्चालनमा ल्याउनुका साथै थप १२ वटा आपत्कालीन बेस स्टेसन स्थापना गरेको जनाइएको छ।यससँगै उद्धार, राहत सामग्री आपूर्ति तथा उद्धार अभियानको कमान्ड र समन्वयका लागि निर्बाध सञ्चार सुविधा उपलब्ध भएको चिनियाँ सञ्चारमाध्यमले उल्लेख गरेका छन्।स्थानीय दूरसञ्चार अधिकारीहरूले हवाई र जमिन दुवै माध्यमबाट सञ्चार सहयोग गर्ने प्रणालीसमेत सञ्चालनमा ल्याएका छन्।यसअन्तर्गत ठूला मानवरहित विमान तथा सञ्चार रिले ड्रोन प्रयोग भइरहेका छन्।यसरी सडक, सञ्चार तथा उद्धार संरचना क्रमशः पुनःस्थापित गर्दै चीनले पहिरो प्रभावित क्षेत्रमा खोजी तथा उद्धार अभियानलाई थप प्रभावकारी बनाउने प्रयास गरिरहेको छ।