५८ लाख रुपैयाँ बराबरको अवैध सामानसहित ट्रक प्रक्राउ

सबिना प्रजा

जिल्ला प्रहरी कार्यालय नवलपुर अन्तर्गतको प्रहरी टोलीले देवचुली नगरपालिका–१६ रजहरबाट करिब ५८ लाख रुपैयाँ बराबरको अवैध सामानसहित ट्रक नियन्त्रणमा लिएको छ । प्रहरीका अनुसार आइतबार बिहान करिब ९ः३० बजे सवारी साधन चेकजाँचका क्रममा बुटवलबाट नारायणगढतर्फ जाँदै गरेको प्र.०३०३–००१ ख ३८२६ नम्बरको ट्रकलाई रोकी जाँच गर्दा बिना बिल भरपाइका विभिन्न सामग्री फेला परेको हो ।

उक्त ट्रक भक्तपुर सूर्यविनायक नगरपालिका–८ निवासी ३० वर्षीय सजेन्द्र मचामसीले चलाइरहेका थिए । प्रहरीले चालकसहित ट्रक नियन्त्रणमा लिएर थप अनुसन्धान भइरहेको जनाएको छ । बरामद सामानको अनुमानित मूल्य १८ लाख १५ हजार ३ सय रुपैयाँ रहेको प्रहरीले जनाएको छ । साथै ट्रकको अनुमानित मूल्य ४० लाख रुपैयाँ गरी कुल ५८ लाख १५ हजार ३ सय रुपैयाँ बराबरको सामान तथा सवारी साधन नियन्त्रणमा लिइएको हो । प्रहरीले ट्रकबाट एयरपड्स प्रो लेखिएका ७ सय थान एयरबड, विभिन्न कम्पनीका १ हजार ६८० प्याकेट मोबाइल ग्लास, ‘सिरिज ९’ र ‘अल्ट्रा ९१’ लेखिएका २०५ थान स्मार्टवाच, ६८ सेट टू–वे रेडियो (हेन्डसेट), ६५ जोर नाइके लेखिएका जुत्ता, ३७४ जोर चप्पल तथा ७ हजार थान वाटरप्रुफ मोबाइल पाउच बरामद गरेको जनाएको छ ।