झलनाथ खनाल अस्पताल भर्ना स्वास्थ्य अवस्था बुझ्न पुगे एमाले अध्यक्ष ओली

टिकाराम भन्डारि
काठमाडौं । पूर्वप्रधानमन्त्री एवं नेपाली कम्युनिस्ट पार्टीका वरिष्ठ नेता झलनाथ खनाल स्वास्थ्यमा समस्या देखिएपछि अस्पताल भर्ना भएका छन्। उनको स्वास्थ्य अवस्थाबारे जानकारी लिन नेकपा एमालेका अध्यक्ष एवं पूर्वप्रधानमन्त्री केपी शर्मा ओली अस्पताल पुगेका छन्।
खनाललाई आइतबार काठमाडौंको धुम्बाराहीस्थित ह्याम्स अस्पतालमा भर्ना गरिएको हो। उनको मुटुमा समस्या देखिए पनि हाल स्वास्थ्य अवस्था सामान्य रहेको खनालको सचिवालयले जनाएको छ।
खनाल अस्पताल भर्ना भएको जानकारी पाएपछि एमाले अध्यक्ष ओली अस्पताल पुगेर उनको स्वास्थ्य अवस्थाबारे जानकारी लिएका हुन्। सो अवसरमा ओलीले खनालको शीघ्र स्वास्थ्यलाभको कामनासमेत गरेका छन्।
स्वास्थ्य समस्याका कारण खनाल पछिल्लो समय पार्टीका विभिन्न गतिविधिमा सहभागी हुन सकेका थिएनन्। असोज २३ गते नेपाली कम्युनिस्ट पार्टीको केन्द्रीय कार्यसंयोजन समितिको बैठकमा पनि उनी अनुपस्थित रहेका थिए। त्यसबेला उनको सचिवालयले स्वास्थ्य समस्याकै कारण बैठकमा सहभागी हुन नसकेको स्पष्ट पारेको थियो।
नेपाली कम्युनिस्ट आन्दोलनका पुराना तथा अनुभवी नेताका रूपमा परिचित खनाल नेकपा एमालेका पूर्वअध्यक्षसमेत हुन्। उनले २०६७ सालदेखि २०६८ सालसम्म नेपालको प्रधानमन्त्रीका रूपमा सरकारको नेतृत्व गरेका थिए।
हाल ह्याम्स अस्पतालमा उपचाररत खनालको स्वास्थ्य अवस्थाबारे थप विवरण सार्वजनिक भएको छैन। उनको स्वास्थ्यमा सुधार आउने अपेक्षा गरिएको छ।