नयाँ शिराबाट अघि बढाउन शुद्धीकरण सुदृढीकरण र पुनर्जागरण आवश्यक

टिकाराम भन्डारि

निर्वाचन परिणामपछि एमालेभित्र पार्टीलाई नयाँ ढंगले अघि बढाउनुपर्ने बहस उठेको थियो। महासचिव पोखरेलले समेत पार्टीलाई नयाँ शिराबाट अघि बढाउन शुद्धीकरण, सुदृढीकरण र पुनर्जागरण आवश्यक रहेको बताउँदै पुनर्गठनको कार्ययोजना बनाउनुपर्ने धारणा सार्वजनिक गरेका छन्।नेकपा एमालेभित्र पार्टी पुनर्गठनको बहस चलिरहेका बेला उपाध्यक्ष विष्णु पौडेल र महासचिव शंकर पोखरेलको भूमिकालाई लिएर नयाँ राजनीतिक चर्चा सुरु भएको छ। केही समयअघि पुनर्गठनको बहसमा दुवै नेता नजिक देखिए पनि पछिल्लो समय उनीहरूको राजनीतिक भूमिकामा फरकपन देखिएको विश्लेषण हुन थालेको छ।

यसैबीच, पौडेल र पोखरेलबीच लामो समयदेखि आन्तरिक प्रतिस्पर्धा र शक्ति सन्तुलनको विषय जोडिँदै आएको छ। उनीहरू दुवै एमाले अध्यक्ष केपी शर्मा ओलीनिकट समूहमा रहे पनि पार्टीभित्र उनीहरूबीचको राजनीतिक प्रतिस्पर्धा नयाँ विषय भने होइन।पछिल्लो समय पुनर्गठनको बहसमा पौडेल र पोखरेलको भूमिकालाई लिएर विभिन्न दाबी सार्वजनिक भएका छन्। कतिपय विश्लेषणमा पौडेल पुनर्गठनको पक्षमा सक्रिय हुँदै पछि ओलीसँग नजिकिएको दाबी गरिएको छ भने अर्को पक्षले भने एमालेभित्रको पुनर्गठन नै संस्थागत प्रक्रिया भएकाले यसलाई व्यक्तिगत गुटबन्दीका रूपमा व्याख्या गर्नु उचित नहुने बताउँदै आएको छ।

महासचिव पोखरेलले पनि पार्टीभित्र मतभेद र विवाद चर्किएको भन्ने चर्चालाई अस्वीकार गर्दै पुनर्गठनसम्बन्धी प्रक्रिया पार्टीकै औपचारिक निर्णयअनुसार अघि बढिरहेको बताएका छन्। उनका अनुसार आमनिर्वाचनको समीक्षा गर्दै पार्टीलाई नयाँ दिशामा अघि बढाउने विषयमा कार्यदलले सुझाव संकलन गरिरहेको छ।यता पौडेल र पोखरेलबीचको शक्ति संघर्ष पुरानै भएको तथ्य पनि एमालेभित्र चर्चा हुने गरेको छ। विगतमा महाधिवेशनदेखि प्रदेश तहसम्म उनीहरूबीचका समर्थकबीच प्रतिस्पर्धा देखिएको थियो। पछिल्लो समय भने दुवैबीच संवाद र सुलहको प्रयाससमेत भएको रिपोर्ट सार्वजनिक भएको छ।यसबीच पौडेल पार्टीको निर्वाचन समीक्षा तथा पुनर्गठनसम्बन्धी कार्यक्रममा सहभागी भइरहेका बेला सम्पत्ति शुद्धीकरणसम्बन्धी अनुसन्धानका लागि पक्राउ परेको घटनाले पनि एमालेको आन्तरिक राजनीतिमा चर्चा पाएको थियो।अब पुनर्गठनको बहस फेरि अघि बढिरहेका बेला एमालेभित्र मुख्य चासो भनेको ओली नेतृत्व, शंकर पोखरेलको आगामी भूमिका र विष्णु पौडेलको राजनीतिक समीकरण कसरी अघि बढ्छ भन्नेमा केन्द्रित भएको छ।पौडेल र पोखरेलबीचको सम्बन्धलाई लिएर बाहिर आएका ‘एकले अर्कालाई अघि सार्ने र पछि समीकरण बदल्ने’ जस्ता आरोप भने राजनीतिक विश्लेषण र आलोचना हुन्; सम्बन्धित नेताहरूले त्यस्तो आरोपलाई पुष्टि गरेका छैनन्।