आज घटस्थापना विधिपूर्वक जमरा राख्दै

सुरेश कुमार थपलिया
काठमाडौं, असोज २५। नेपालीहरूको महान् पर्व बडादसैँ आजदेखि विधिवत् रूपमा सुरु भएको छ। आज असोज २५ गते आइतबार घटस्थापना मनाइँदै छ। घटस्थापनासँगै हिन्दू धर्मावलम्बीहरूको नौ दिनसम्म चल्ने नवरात्र आरम्भ भएको हो।

घटस्थापनाका दिन घरघरमा शुभसाइतमा पूजा गरी कलश स्थापना गरिन्छ। गाईको गोबरले लिपपोत गरिएको पवित्र स्थानमा माटो राखेर जौ, मकै तथा अन्य अन्नका बीउ छरिन्छ। यसरी उमारिने पहेँलो जमरालाई दसैँको प्रमुख धार्मिक प्रतीकका रूपमा लिने परम्परा छ।
नवरात्रको पहिलो दिन देवी दुर्गाको शैलपुत्री स्वरूपको पूजा आराधना गरिन्छ। भक्तजनले घरमा दुर्गा भवानीको पूजा गर्दै परिवारको सुख, शान्ति, समृद्धि र सुस्वास्थ्यको कामना गर्छन्।

घटस्थापनासँगै दसैँको धार्मिक तथा सांस्कृतिक चहलपहल बढ्न थालेको छ। आगामी दिनमा फूलपाती, महाअष्टमी, महानवमी र विजयादशमी मनाइनेछ। विजयादशमीका दिन मान्यजनबाट टीका, जमरा र आशीर्वाद ग्रहण गर्ने परम्परा रहेको छ।