अशोक शेरचनलाई अनुसन्धान ब्युरोले पक्राउ

प्रभु बैंकका प्रमुख कार्यकारी अधिकृत (सीईओ) अशोक शेरचनलाई नेपाल प्रहरीको केन्द्रीय अनुसन्धान ब्युरो (सीआईबी) ले पक्राउ गरेको छ। बैंकका पूर्वअध्यक्ष देवीप्रकाश भट्टचनमाथि भइरहेको कर्जा अपचलन प्रकरणसँगै शेरचनमाथि पनि संलग्नता देखिएपछि उनी नियन्त्रणमा परेका हुन्।सीआईबीका प्रवक्ता शिवकुमार श्रेष्ठका अनुसार भट्टचन–लामा कर्जा काण्डमा बैंकको निर्णय प्रक्रियादेखि कर्जा प्रवाहसम्म सीईओको भूमिकाबारे गम्भीर प्रश्न उठेपछि पक्राउ आवश्यक बनेको हो। कात्तिक २२ गते सीआईबीले प्रभु बैंकको बिजुलीबजारस्थित कार्यालयमा छापा मारेर कर्जा फाइल र कागजातहरू नियन्त्रणमा लिएको थियो।यसअघि कात्तिक ११ मा प्रभु म्यानेजमेन्ट प्रालिकी अध्यक्ष कुसुम लामाले दर्ता गराएको ९८ करोड ठगी उजुरीका आधारमा पूर्वअध्यक्ष भट्टचन पक्राउ परेका थिए। भट्टचन र लामाकै कम्पनीलाई दिइएको करिब एक अर्ब रुपैयाँ कर्जा प्रक्रियामा अनियमितता, स्वार्थ द्वन्द्व र मापदण्ड उल्लंघन भएको अनुसन्धानले देखाएको छ।सीआईबीले अब बैंकका थप अधिकारी तथा सञ्चालकहरूमाथि पनि सोधपुछ गर्ने तयारी गरेको छ। अध्यक्षपछि सीईओ समेत पक्राउ परेपछि प्रभु बैंकको शीर्ष व्यवस्थापनमा ठूलो संकट उत्पन्न भएको छ। प्रहरीका अनुसार कर्जा काण्डमा संलग्न जो–कोहीविरुद्ध कानुनी कारबाही कडाइका साथ अघि बढाइनेछ।