एक हजार चोरीको आरोपमा श्रीमतीको विभत्स हत्यामा संलग्न श्रीमान पक्राउ

मिति २०७९।०४।११ गते बिहान अं.०९:३० बजेको समयमा जिल्ला रुपन्देही कञ्चन गाउँपालिका वडा नं.१ डेलरमा आफ्नै घरमा श्रीमान र छोरासँग बसोबास गर्दै आईरहेकी वर्ष ३१ की साबित्री थापा क्षेत्री आफ्नै सुत्ने कोठामा मृत अवस्थामा रहेको भन्ने सूचना प्राप्त हुनासाथ ईलाका प्रहरी कार्यालय सालझण्डीबाट अनुसन्धानको लागी प्रहरी टोली खटिई गएकोमा निज मृतकलाई टाउकोमा गहिरो चोट लागेको, कपालमा काठको टुक्राहरु र कोठामा रगत बगेको र छिटाहरु देखिएको र शरिरका विभिन्न भागमा निलडामहरु समेत देखिएको मृत शरिर फेला परेकोमा आवश्यक प्रकृया पश्चात लाशलाई पोष्टमार्टमको लागि प्रादेशिक अस्पताल बुटबल पठाईएको थियो ।

सो पश्चात निज सावित्रीको हत्या शंकास्पद देखिएको र हत्या भएको हुनसक्ने देखिएकोले आवश्यक अनुसन्धानको लागि मृतकको श्रीमान बर्ष ३३ को यम बहादुर थापा क्षेत्रीलाई अनुसन्धानको लागि तत्कालै निजकै घरबाट नियन्त्रणमा लिईएको, अनुसन्धानको क्रममा अघिल्लो दिन साँझ निज यम बहादुर थापाले मादक पदार्थ सेवन गरी सुतेकोमा निजकी श्रीमति सावित्री थापाले समेत अघिल्लो दिन साँझ दराजमा श्रीमानले राखेको रु.१,००० (रु.एक हजार) लिई रक्सी किनेर खाई रातको समयमा आई मृतक सावित्री थापा भुँईमा, प्रतिवादी यम बहादुर थापा र छोरा खाटमा सुतेकोमा रातको करिब २ बजेको समयमा प्रतिवादी यम बहादुर थापा उठेर पैसा गन्दा एक हजार कम भएपछि निज यम बहादुरले श्रीमतीलाई उठाई पैसा नसोधी लिई गएको भनि कुटपिट गर्ने क्रममा श्रीमतीको कपाल समाई निज आफैँ सुतेको खाटको खुट्टा र भित्तामा टाउको ठोकिदिई श्रीमतीको हत्या गरेको भन्ने खुल्न आएकोले निज यम बहादुर थापा क्षेत्रीलाई पक्राउ गरी ज्यान सम्बन्धि कसुर अन्तर्गत म्याद थप गरि थप अनुसन्धान कार्य भैरहेको छ ।