स्ववियु निर्वाचन स्थगित

चितवनको भरतपुर स्थित वीरेन्द्र बहुमुखी क्याम्पसमा स्ववियु निर्वाचन स्थगित भएको छ । क्याम्पसले शुक्रबार प्रेस विज्ञप्ती जारी गरेर अर्को सूचना नआएसम्मका लागि निर्वाचन स्थगित गरिएको जनाएको छ ।
स्ववियु निर्वाचन समितिको आज बसेको बैठकको निर्णय अनुसार पूर्व प्रकाशित कार्यतालिका बमोजिम चैत ५ गते हुने भनिएको निर्वाचन सम्पन्न गर्न सम्भव नदेखिएकाले तत्कालका लागि स्थगित गरिएको निर्वाचन अधिकृत टीकाराम रिजालले जानकारी दिनुभयो । स्ववियु निर्वाचनलाई लिएर विद्यार्थी संगठनहरूबीच विवाद भएपछि निर्वाचन स्थगित गरिएको क्याम्पसले जनाएको छ । स्वतन्त्र विद्यार्थी युनियनको निर्वाचनका सन्दर्भमा बिहिबार विद्यार्थी संगठनले कलेजमा ताला लगाएको विज्ञप्तीमा उल्लेख गरिएको छ ।
क्याम्पसले निर्वाचनका लागि अनुकुल वातावरण सिर्जना गर्न गराउन सम्पूर्ण विद्यार्थी संघ संगठन र सरोकारवालाई अनुरोध गरेको छ ।